Colossal Cave aw itam paki

Naat utuhuuniqw itam Colossal Cave aw pootawisa. Pep Polimana nit Qöyawaysi piw hiita aw hintsaki.

Pep puma paahut aqw hiisayhoyat muunat yukuya.

Pangqw tsaatsayom tuuwat aw mortoynat pan puma tsöqat ang “semiprecious jewels” hepnumyangwu. Pahaanam pep huuyankit ep put tuuwat huuyanta. Puma tuuwat ang put himu.owat ang tupkyaqw pan puma put tsaatsakmuy aw huyangwu. Oovi pan puma put hiita owat tutwangwu ayoo pam tuuwa muna wivangwuqe’. Oovi pantsatskya mamant.

Panso itam paki. Piw pangqw lomasumawta. Pay qa pas wuuyoqa Colossal Cave. Pay suupan hiisayhoya pam’i.

Qöyawaysi pas ep tsoniita oovi nungwu nu’ aw kyaatayma. Ephaqam is uriningwuniiqe’ nawus put may nguykyangw nit piw tsöpmangwu. Pay niikyangw kwangwa’ewya itam.

Momori itam!

Momori itam!

Yep tsangaw itaa kiqöt ep “swimming pool”. Pangqw mamant nit itam kwangwamomorngwu.

Pas pavan ‘itaatim pangqw qayamakniqey naawaknagwu tis pas pavan tsoniitangwuniqw oovi.

Pep ‘ima pas teevepningwu oovi pas nu’an taqtsokiwta. Lomasoniwa pu’. Se’alth ep pas im qöötsati oovi nukwanghinti ima pan ahoy kuwantotiqw.

Qöyawaysi pay “floaties” aw momorngwu. Polimana pay paapu naap momorngwu. Nu’ pi pay pookot an naat momorngwu.

"Mount Lemmon" aw itam soosoyam waywisa

Naat tömöt ep ‘I maanat pu’ naat pew pituuqe’ itam Tucson angqe’ yaqwtinuma Melodit amum.

Itamuy teevengwwat pep wukotuupela “Mount Lemmon” pan pahaanam navotii’yungwa. Panso itam soosoyam waywisa.

Yep nu’ nit Qöyawaysi tuupelat ang wungwuvi. Yang peeniwqat ang suupan as itam pas oovehaqw niikyangw pay as qa pas "is uru". Tuupela pay itamuy ayoohaqam.

Yangqe' Polimana nit Qöyawaysi warikiwta. Pu’ itam piw pöhut tutwaniiqe' pang itam hiisavo kwangwawaywisa. Tömöt ep naat pay kwangwasumawtangwu oovi itam panso naasastato.


Polimana wuupat hokyayta pu’. Pam ura “baseball” sa pas tunglaytangwuniiqe’ naat yep qa hiita pas aw pavan hohonaqwlawu. Niikyangw pam “gymnastics" aw pay sasqa. Oovi naat pam naahongvilawu. Qöyawaysi pay tsöqaptat yuyku. Tsoniitangwu pamningwu yaw'i.

Yep hak Hopitaaqa. Hin pi pam maatsiwa. Yaw hiita pas kwivipentangwu yaw pam’i. Naat kya qa soosokhiita tuwiitaqat hakim pan tuwiiyungwa. “Piw naat pam hiita hinwat peena” kya hakim pan aw wuuwantangwu.

Walnut Canyon aw itam pootama

Tömöt ep itam ahoy Tucson aw nimiwmaqw itam “Walnut Canyon” ep hiisavo huruuti.

Pep itam hiisavo as waynumni taqw Qöyawaysi pas ephaqam qakwangwahintangwu itam ang hoytaqw nit pam qapuwvaqw oovi itam pepehaq haaktota. Pep itam mooti nöst pu’ itam panso haawi.

Pep hisatsinom as kiy’yungwa. Pang oovi tuupelat ang kiikihu tsurukiwyungwa.

Pang pi itam as yesngwuniqw kya itam qa pas yan wukosinom naat itam pep as yesqw.

Qöyawaysi piw pas mongtuwiitaqa oovi itamuy ayatangwu itam qa haqam pas huruutiniqat.

Oovi yep itamumi maasanta itam yaw aapiyaniqat.

Oovi itam nawus aapi atkyami hoyoyota.

Ang itam kiqö’am ang pootinuma.

Niqw itam hisatniqw atkyami pitu.


Pu’ oovehaq oomawkive’ nit piw oomihaqam umuklawu. Polimana tsawnaqe’ yaw itam ahoyyaniqat kita.

Oovi ahoy itam wungwuvi. Pay lomahinta pep’e. Pu' pay pangkw yuumosa Tucson ahoy aw pitutoqw Qöyawaysi puwva.

Tomot ep a’ni Rillito River’t ep munva

Tomot ep a’ni yooyoki.

Itaakwayngyaqw ep patupha “Rillito River” pan tungwaytaq niikyangw as qa hisat pas ang muunaningwu. A’ni yokva niiqe’ pang ‘a’ni munva.

‘Iits talavay nu’ tumalayto nit nu’ aw yorik pas pavan ‘a’ni oopokiwta. Nu’ ahoy nimaqw nu’ aw pootaqw naat oopokiwta.

‘I yaw 15 year flood.

Yan yaw ephaqam yokvangwu nit yan munvangwu.

Okiw kutsiipu ki’at songqa haqamiti.

Hihin ‘is ‘utiningwu.